Təqva
Müsəlmanlar arasında ən çox bəhs edilən dəyərlərdən biri də təqvadır. Müsəlmanın əxlaqi və imani yönünü birləşdirən bu kəlimə üzərində xeyli düşünməyə ehtiyac vardır. İslami həyat prinsiplərinin toplusu olan təqva günümüzdə hər bir müsəlmanın ruhani tələbatıdır.

İslam ümmətinin bu gün ki, vəziyyətinin əsas səbəblərindən biri də heç şübhəsiz həyatlarının həqiqi təqvadan uzaqlaşmasıdır. Allah-təala Qurani–Kərimdə müsəlmanları təqvalı bir həyata çağırmış, təqvanı həqiqi msəlmanlığın vəsfi hesab etmişdir: “Ey iman gətirənlər! Allaha layiqincə təqvalı olun. Yalnız müsəlman olduğunuz halda (müsəlman kimi) ölün!” (Ali İmran 102)

Təəssüf ki, dilimizə təqva sözü həmişə Allahdan qorxmaq olaraq tərcümə edilməkdə və bir çox möminlər tərəfindən də belə anlaşılmaqdadır.  Əslində isə Allah qorxusu təqvanın sadəcə bir çüzü, bir hissəsidir. Təqva öz mənası etibarı ilə Allaha qulluğun, bütün məsələlərdə ona bağlılığın bütün sahələrini əks etdirməkdədir. Təqva həmişə Allahın nəzərlərini öz üzərində hiss etmək, onun bütün əmrlərinə sevərək tabe olmaq və bütün əməllərdə onun əmrlərinə qarşı gəlməkdən uzaq durmaqdır. Əslində bu dediyimiz də təqvanı digər bir yönü ilə izah etməkdir. Təqva yaşandıqca dərk edilən bir həyat tərzidir.
Dediyimiz kimi təqva kəlimə olaraq bir çox dərin mənaları ehtiva etməkdədir. Hz. Əli (r) təqvanı belə izah  edir: “Təqva Cəlil  olan  Allahdan qorxmaq, nazil olanla əməl  etmək, aza razı olmaq, axirət günü üçün hazırlanmaqdır.” Digər bir alim isə təqvanı belə tərif etmişdir: “Təqva odur ki, Allah səni qadağan etdiyi  əməllərdə  görməsin, əksinə səni əmr etdiyi əməllərdə  görsün.”
Ubeyyə bin Kə`b təqvadan bəhs edərək belə deyir: “Birisi tikanlı bir yerə ayağı yalın düşsə necə gəzər?! Bax, möminin halı dünya həyatında belədir.”
Təqvanın ümmətin və müsəlman fərdin həyatında nə qədər əhəmiyyətli olduğunu bilmək üçün onun Quranda nə qədər çox zikr edilməsinə, sünnətdə ona sarılmağa nə qədər çox təşviq edilməsinə baxmaq kifayətdir. Allah-təalə bizə Quranda, təqvanın ən xeyirli azuqə, tədarük olduğunu bildirməkdədir Allah-təalə buyuru:

“Tədarük görün. Ən yaxşı tədarük isə təqvadır.” (Əl-Bəqərə 197) Beləliklə dünya yolçuluğunda və axirət diyarında bizə ən lazımlı azuqə təqvadır. Həmçinin, təqva çətinlikdən çıxmaq üçün, ruzinin artması və bərəkətlənməsi üçün bir vasitədir. Səbr və çalışqanlıq təqvanın insan xislətinə verdiyi keyfiyyətlərdəndir. Ruzi və bərəkət, çətinlikləri dəf etmə bu yönlərdən təqvaya bağlıdır.

“Kim Allahdan qorxsa, Allah ona (hər çətinlikdən) bir çıxış yolu əta edər. Və ona gözləmədiyi yerdən ruzi verər. ” (Əl-Təlaq 2, 3) Bununla bərabər, həm də təqva saleh əməllərin qəbul olması üçün şərtdir. “Allah yalnız müttəqilərdən (qurban) qəbul edər!” (Əl-Maidə 27) Allahı nəzərə almayanların, əməllərini onun rizasına uyğun qurmayanların etdikləri insanların nəzərində nə qədər xoş görünsə də Allahın dərgahında bir heçdir.

İnsanların Allah yanında məqamları da onların təqvaları ilə ölçülür:
“Allah yanında ən hörmətli olanınız Allaha ən çox təqvalı olanınızdır.” (Əl-Hucurat 13)
Təqva əhlini qorumağı və onları mükafatlandırmağı Allah öz üzərinə götürmüşdür və Allah vədinə sadiqdir. “Həqiqətən, Allah Ondan qorxub pis əməllərdən çəkinənlər və yaxşı işlər görənlərlədir!” (Əl-Nəhl 128) “Və onlara axirətdə ikram olaraq gözəl bir yer verəcəkdir.” (Əl-Qəmər 54,55)

Bu günkü günümüzdə ümmət və fərd olaraq təqvaya ehtiyacımız var. Qəlblər qatılaşmış, Allah üçün axan göz yaşları qurumuş, insanlar arasında günahlar yayılmış, əxlaqlar pozulmuşdur. Dünya və axirət qurtuluşu təqvalı bir ömür yaşamaqdadır. Kimliyimizdən asılı olmayaraq qadınlı kişili, böyüklü kiçikli  hamımız bu sifətə malik olarıqsa cəmiyyətimiz islah olar, bu günkü fəsadlarla üz-üzə olmarıq. Sonda Allah Rəsulunun (s) sözərini xatırlayaq: “Təqvalı ol! Həqiqətən hər bir xeyir işin başı təqvadır.” Başqa bir rəvayətdə isə: “Təqvalı ol! Həqiqətən təqva bütün xeyirlərin anasıdır.”

4026 dəfə oxunub

İstifadəçi şərhləri

çap versiyası     göndər     yuxarı